જૂના જમાનામાં પણ હતી આજની લેટેસ્ટ ટેકનોલોજી!
જૂના જમાનામાં પણ હતી આજની લેટેસ્ટ ટેકનોલોજી!
આજની હાઈ-ફાઈ અને વાઈ-ફાઈ જનરેશનને શું ખબર કે અમારા જમાનામાં પણ કેવી જાતની કોમ્પ્યુટર ટેકનોલોજીઓ હતી !
બાપાની બે ધોલ પડે અથવા નિશાળમાં માસ્તર કાન આમળે કે તરત જ અમારી આખી ‘સિસ્ટમ રિ-સ્ટાર્ટ’ થઈ જતી હતી !
ઘરકામ ના કર્યું હોય ત્યારે ઊંધુ ઘાલીને બીજાની નોટમાંથી ધડાધડ ઉતારો કરી લેતા હતા તે અમારું ‘ફ્રી ડાઉનલોડ’ હતું !
લખોટી, ગિલ્લી-ડંડા, કુકરીઓ, બોલ, બેટ, પત્તાં, ભમરડાં… આ બધાં અમારાં ‘ગેમિંગ એપ’ હતાં !
લગ્નોમાં દાળ પીરસવાનો ચાન્સ, રિસેસમાં નોટ આપવાની તક, અને છોકરીની સાયકલમાંથી હવા નીકળી ગઈ હોય ત્યારે હવા ભરી આપવાનો મોકો… આ બધાં ‘ડેટિંગ એપ’ હતાં !
અને સ્કુલ છૂટ્યા પછી પાછળની કમ્પાઉન્ડ વોલ, લગ્નમાં વાડીનો પાછળનો ભાગ, બજારમાં બરફના ગોળાની લારી અને સસ્તી રેસ્ટોન્ટનો ફેમિલી રૂમ… આ બધા અમારા ‘ચેટિંગ રૂમ’ હતા !
વિવિધ ભારતી, રેડિયો સિલોન, ઓલ ઇન્ડિયા રેડિયોની ઉર્દૂ સર્વિસ… આ બધાં અમારા ‘ઓનલાઈન લાઈવ મ્યુઝિક એપ’ હતાં !
અને 20-25 રૂપિયાની ઓડિયો કેસેટોમાં જે પસંદગીના ગાયનોનું રેકોર્ડિંગ કરાવીને રાખતા એ અમારી ‘મ્યુઝિક ફાઈલો’ હતી !
હીરો-હિરોઈનોના ફોટા, પિકચરની રંગની ફ્રેમો, લખોટીઓ, બિલ્લા… આ બધી અમારી ‘કેશ-લેસ કરન્સી’ હતી !
જે છોકરો આપણી ફેવરીટ છોકરી ક્યાં રહે છે, બાપા શું કરે છે, ઘરમાં છોકરી એકલી ક્યારે હોય છે, ફોન નંબર શું છે.. આ બધું શોધી લાવે તે અમારું ‘ગુગલ સર્ચ એન્જિન’ હતું ! બોલો.
મારફાડ રીતે ચોર-પોલીસ રમતા હતા તે અમારી ‘પબ્જી’ ગેમ હતી અને ગબ્બીમાં લખોટીઓ રગડાવતા હતા તે અમારી ‘કેન્ડી ક્રશ’ ગેમ હતી !
અને ફાઈનલી… ફ્રી પિરિયડમાં કે શાળાના પ્રવાસમાં જે અંતકડી રમતા હતા તે અમારું ‘ઇન્ડિયન આઈડોલ’ હતું…
અને નિશાળના વિચિત્ર માસ્તરો અને માસ્તરાણીઓ અમારું ‘કોમેડી સરકસ’ !
મન્નુ શેખચલ્લી
