એક ગુજરાતી ગઝલ : નથી સંબંધ કોઈ, ને છતાં સંધાન રાખે છે
એક ગુજરાતી ગઝલ : નથી સંબંધ કોઈ, ને છતાં સંધાન રાખે છે
નથી સંબંધ કોઈ, ને છતાં સંધાન રાખે છે;
કદી કાજળનું જળ ના થાય, એનું ધ્યાન રાખે છે!
ઉદાસીમાંય ખુશ દેખાડવાનો છે કસબ હાંસિલ,
હૃદય માટે આ ચહેરો એટલે ગુમાન રાખે છે.
ખબર એની નથી ગોદામમાં શું શું ભરેલું હોય?
છતાં એ હોઠ પર તો સ્મિતની દુકાન રાખે છે!
પછી ઉપચાર જખ્મોનો સરળતાથી નથી થાતો,
સ્મરણને એ જ કારણથી એ કાયમ મ્યાન રાખે છે.
દિલાસો આપશે, ઉમ્મીદ રાખી કહું બધીયે વાત,
ખબર છે ભીંત ઘરની એની ભીતર કાન રાખે છે.
સ્વભાવે શાંત છું – એ રીતની ઓળખ ભલે મારી;
ગમે છે ખૂબ! એની આંખ જે તોફાન રાખે છે.❜❜
