શાક માં મીઠું વધારે પડયું…

શાક માં મીઠું વધારે પડયું…

આજ ઘર બધાના માથે ચઢ્યું,
કેમકે શાકમાં મીઠું વધારે પડયું…

કોકનુ કંઈક મોં બગડ્યું,
તો કોકે વળી અન્ન છાંડ્યુ…

ને કોક તો રીતસરનું લડી જ પડયું
કેમકે શાક માં મીઠું વધારે પડયું…

સ્હેજ ખારાશ વધી,
એમાં તો મને ય જાણે ખટાયુ…
પણ ના જાણ્યું કોઇએ,
કે કેમ કરીને આવું બન્યું…

બહુ સાચવ્યુ,
તોયે એ સાચવી ના શકી…
ને એક આંસુ,
સીધુ શાકમાં પડયું…

લાગણીની વાત ના કરશો,
સાહેબ…
અહીં તો બસ,
શાકમાં મીઠું વધારે પડયું…

લાગણી જો સમજાય
તો મન ને પૂછજો :
“ક્યાંક અન્નપૂર્ણા નું મન દુભાયું?”

…ને જો કયારેક એમ બને
તોય પ્રેમ થી જમીને
અંતર માં ખંખોળજો કે…
“કેમ શાકમાં મીઠું વધારે પડયું?”

Check more posts here.